TU LAH DEH

Kuman seborang laut nampak, kudih kek koting monanah, carik kek kain orang ditinjau-tinjau, rabak kek kain sendiri cubo ditampal ngan guni. Tulah yang bolaku kek sedaro kito parti bulan mengambang tu (Atok totap memanggil sedaro sobab eh satu yo, bahaso eh samo, makan boselo, buntut bocebok walaupun dio orang dah cap Atok dan puak-puak ni ahli nerako). Apo yang Atok nak cakap ni umpamo paku dulang kayu seropeh, cakap orang dio yang lobeh. Rentetan yang bolaku semonjak duo ni, jelas umpamo tongahari dipasang spotlight. Kok bogogar pokok tu adolah yang menggoyang eh. Kok tak boghuk, tontu ado kogho takpun tupai.

1. Dalam diam-diam, totibo Nik Ajis nak adokan EGM. Nak cover line, tukar namo, buek seminar jolah. Apo bezo eh? Totap bokumpol nak bincangkan masalah.

2. Peh tu Haji Adi buek konyataan yang dio akan totap menjadi presiden. "Apo plak kau cakap camtu tu, Ji? "Ko dah ado orang lain nak rampeh jawatan kau tu?"

3. Cam biaso, Najib masih mengamalkan budayo orang Melayu, bilomano M.A.P. Nik Ajis masuk spital, mako dilawat eh (Baco bobotul, bukan eh liwat doh). Tengok dari gayo gambar tu, Nik Ajis menorimo lawatan tu dengan hati yang tobuko dan mendoakan agar Najib panjang umur. Tapi ari tu atok baco dalam Buletin Keadilan, Pok Nik ado cakap yang UMNO mesti mati. Ni yang kompius sikit ni. Sapo deh Najib dan sapo deh UMNO? Apokah botul yang Atok baco ni ataupun erdogan-erdogan upahan ni yang mengelirukan orang tuo ni? Botul jugak apo yang dicakapkan kek Tun Mahathir tu, cecukuplah tuh. Bak kato orang Negori, "enough is enough". Daripado dilago-lagokan kek orang tuh, baik duduk ajo kek rumah. Bawak berehat.

4. Bab bai’ah tu tak payahlah Atok nak komen panjang-panjang. Maso Atok nak nikah dulu, Tok Kadi tu posan, bocorai tu halal tapi sesuatu yang amat di bonci kek ALLAH. Nak sobut pekataan "cerai" tupun dah meromang bulu tongkuk. Ni plak taklik eh corai talak tigo. Sesedaro Pas sekelian, cakap kito tu adalah doa. Apo yang kito mintak tu kok mendapek. Sok kok gilo talak. Den ni kan eh apo-apo doh, den cakap yo. Kau orang bulih nikah lain, tapi harto sepencarian tu...sian kau orang.

Biasolah kan, kau cakap UMNO ni tak adopun satu yang elok eh. Kunun Pas sumo eh elok, Pas sumo eh wangi, Pas sumo eh lawa. Ahli pas dah ado tompek kek syurgo, tapi akhir-akhir ni dah mulo dah panau dan kurap dah naik ko koning, kudih buto dah merayap ko leher, tapi masih dapek ditutup ngan ketayap dan selendang. Tapi bilo pokung dah menanah, tutup tu bulih, tapi bau eh, loyo tokak dibuek eh.