Feel free to email us at panehmiang@gmail.com.

Saturday, March 28, 2009

BIAR MATI ANAK JANGAN MATI ADAT

Kek sini Atok nak paparkan sikit petatah petitih Adat Pepatih yang menjadi panduan suku sakat Atok kek Nogori Sombilan sompona tamatnyo pohimpunan UMNO dan jugo nak momahamkan lagi persepsi BIAR MATI ANAK JANGAN MATI ADAT.

Kato samo seiyo
Lenggang samo seayun
Duduk samo rondah
Bodiri samo tinggi
Bukit samo didaki
Lurah samo dituruni
Terojun samo basah
Melompek samo patah
Boban borek samo dipikul
Boban ringan samo dijenjeng
Setitik jangan hilang
Sebaris jangan lupo
Mendapek samo lobo
Cicir samo hilang
Hati kuman samo dicicah
Hati gajah samo dilapah.

Bulat air dek gopong
Bulat manusio dek muafakat
Botuah manusio dek muafakat
Cilako manusio dek botolagah

Kono ko porut jangan dikompihkan
Kono ko mato jangan dipojamkan
Padang orang jangan bolari
Padang kito jangan bojenket kaki
Ular dipalu jangan mati
Kayu pomalu jangan patah
Tanah dipalu jangan lomba
BIAR MATI ANAK JANGAN MATI ADAT

Kalau dibalun sobalun kuku
Kalau dikombang solebar alam

Ketok paku kacang bolimbing
Tompurung dilenggang-lenggangkan
Singgah memorun di suaso
Anak dipangku, pusako dijunjung
Komanakan dibimbing
Orang kampong dipandang-pandangkan
Supayo nogori jangan rosak binaso.

Konalkan diri kamu nyato-nyato
Baru dapek kamu mengonal kamu punyo harto pesako
Kenalkan diri kamu rato-rato
Baru mengonal Tuhan yang sangat nyato.

Cerodek toman borunding
Bodoh disuruh arah
Yang pokak mencucuh meriam
Yang buto menghombus losung
Yang tepok menjago jomuran
Kunci anak buah kopado ibu bapak
Kunci ibu bapak kopada tuo
Kunci tuo kopado undang dan
Kunci undang kopado koadilan

Kok jalan bepohontian
Kok kato bekosudahan

Sokali air bah sokali pasir borubah
Sokali tuo boganti sokali adat bokisar
Patah tumbuh hilang boganti
Hilang satu boganti satu
Tak buleh dianjak dialih lagi
Dicabut layu dianjak mati
Gar ateh gelogar, rasuk juo yang monahan
Anak buah bosolimut pagi
Boselendang potang
Kato komudian nan tak bocari lagi.

Kepado yang tuo dan yang mudo yang dah monang baru-baru ni Atok nak boposan:-

Bolajarlah kopada alam yang tobontang.
Kok nak tau tinggi eh gunung, tanyolah si holang
Kok nak tau lebar eh laut, tanyolah si jerung
Dan kok nak tau dalamnyo lubuk tanyolah memorang.

Kopado PAK LAH:-

Janji dilabuhkan
Dalam janji digaduhkan
Sampai janji ditopatkan
Supayo anak buah tak bobilang-bilang.

Akhir kato,

HIDUP DIKANDUNG ADAT
MATI DIKANDUNG BUMI
ADAT NAN TEHUNJAM KO BUMI
ADAT NAN TOSERUNDAK KO LANGIT
ADAT BOSONDIKAN SYARAK
SYARAK BOSONDIKAN KITAB ALLAH
ADAT BIAR MATI ANAK
ADAT JANGAN MATI ADAT.

p/s: Kok patut kito singkirkan Bro Anwar Bin Ibrahim demi menjago kemurnian bangsa Melayu di Tanah Melayu, mako Datok Najib yang sebonar eh telah membuang anak Melayu yang derhako kepado tanah botuah ini demi meneruskan survival adat Melayu di Tanah Melayu yang botuah ini.

6 comments:

  1. Panakiak Pisau Siraut,
    Ambiak galah batang lintabuang,
    Salodang ambiak ke niru,
    Nan satitiak jadikan laut,
    Nan sakapa jadikan gunuang,
    Alam takambang jadikan guru,
    Usang usang diperbaharui,
    Lapuk lapuk dikajangi,
    Berjenjang naik,
    Bertanggo turun,
    Yang cerodik tompat bertanyo,
    Yang pandai tompat berguru,
    Alang tukang kayu terbuang,
    Alang cerodik binaso Adat,
    Alang alim rosak agamo,
    Alang sefaham kacau negori.

    Pesako kepado lelaki,
    Seka kepada pompuan.
    Yang elok dipakai,
    Yang buruk dibuang,
    Kalau singkat mintak disambung,
    Kalau panjang mintak dikorat,
    Kalau kuyak minta ditampal,

    Ibu Adat muafakat.
    Dari nenek turun ko omak,
    Dari omak ke kemanakan,
    Patah tumbuh hilang borganti,
    Pusako lamo begitu juo,
    Adat bersendi hukum,
    Hukum bersendi syara',
    Syara' mengato,
    Adat menurut.

    Bulat anakbuah menjadikan Buapak,
    Bulat Buapak menjadikan Lembago,
    Bulat Lembago menjadikan Undang,
    Bulat Undang menjadikan Rajo.

    Rajo menobat dalam alamnyo,
    Penghulu menobat dalam luaknyo,
    Lembago menobat dalam lingkungannyo,
    Buapak menobat pada anak buahnyo,
    Orang banyak, menobat dalam terataknyo.


    sekadar berkongsi jalur adat pusako..

    ReplyDelete
  2. Dok pahang starang bok kawang,,,

    ReplyDelete
  3. Tahniah saya ucapkan kepada mana-mana perwakilan pemuda Negeri Sembilan kerana mengundi Khairy Jamaluddin sebagai Ketua Pemuda ...
    Sedarlah saudara semua yang saudara semua memainkan peranan yang besar untuk memastikan UMNO hancur di pilihanraya yang akan datang.
    Berseronoklah dengan duit haram yang saudara perolehi dari Khairy dan ingatlah ia akan menjadi darah daging pada diri saudara dan anak-anak saudara semua ...
    Tahniah !!!!!!!! Juallah bangsa kita kerana duit ..Moga Allah SWT tempatkan saudara-saudara semua ditempat yang sepatutnya ...AMIN !!!

    ReplyDelete
  4. Kata Pepatah:
    ADAT BOSONDIKAN SYARAK
    SYARAK BOSONDIKAN KITAB ALLAH

    Kok Adat itu menolak hukum hudud, maka sah ia juga menolak kitab Allah, kerana hukum hudud itu bukan buatan manusia. Jadi, manakah yang dikatakan ADAT BOSONDIKAN SYARAK, DAN SYARAK BOSONDIKAN KITAB ALLAH itu? Tok tolong jelaskan.

    ReplyDelete
  5. APA YANG KAU QUOTE KAN TU ADALAH DARI KATA-KATA JALUR ADAT MINANGKABAU.. KO BOLEH BEZAKAN TU TAK?? JGN LETAK AKAL TU KAT TAPAK KAKI..

    ReplyDelete
  6. Tok, kek mano dapek pantun nan panjang lagi berjelo tu..? kalau nak dikaghang sendiri,,kigho hebat yo tu..eden ni tak ghoti amek pantun sundam seloko ni do..
    tapi yolah..sesekali maco pantun pepatih ni sodap yo..! anyhow,,Pemuda Umno memang hampeh bin gampang...geng 304 ni dah dikenal pasti lum..? silolah tubuhkan suruhanjayo utk kesan g304 ni..utk diluputkan dari bumi bertuah ni.,,perosak bangsa dan negaro..! sakit amek ati denn..!

    ReplyDelete

Blog Archive