HATI ATUK TOSONTUH

Minggu lopeh cucu atuk datang nyongok atuk kek kampung. Kan main kombang ati atuk nengok cucu atuk sorang ni. Apo tak eh? Keto bosa, bini eh lawa, cicit atuk tu kan main kiut miut la'ie. Yolah, atuk ni pun bukan calang-calang orang hensem eh.Maso atuk mudo-mudo dululah. Sekrang ni pun mudo la'ie. Ati atuk totap mudo, tambah-tambah nengok uwan kau bokomban.

Cucu atuk ni bosa yo kojo eh, maklumlah orang lepasan universitilah.Tontulah golongan profesional. Kek pejabat ado bilik sendiri, ado sec. plak tu. Bilik ekon tu tak payah cakap doh. Keto buruk atok pun ado ekon.

Tapi apo yang atuk nak crito ni adolah kono menogono dengan pepatah oang dulu-dulu. Kok kacang eh dah dimakan, kulit eh jangan lah disepah-sepahkan.

Lopeh botanyo kabar, dengan selambo jo cucu atok botanyo,"Tok! orang kek sini apo bongap bonar? Dari dulu menimbang ngan dacing senget tu, tak yo borubah-rubah. Buek cam den nia hah, kito pangkah lak bulan biru tu. Kok takdo bulan biru kito pangkah bulan hijau, kok tak yo ado kito pangkah roket. Biar copek kito ko bulan." Boleh kito raso camno botuankan Abd LIM tu atu Cik Nuar ko.

Mongirap yo darah tuo atuk ni. Yolah, dio ingat atuk sekolah atap ni tak sepandai dio yang bolaja kek menaro gading tu.

Diceramah eh la'ie atuk : Atuk tau tak, orang BN ni tak ado yang botul eh doh. Kok pasal kontrak, makan duit borilah kek dio orang. Tomasuk ustad-ustad eh. Sumo eh tu ahli norako jahanam. Atuk kono ingat, atuk dah tuo,, sok kok tak sompek botobat.

Uuumang ai, kan main manih la'ie cakap eh. Peh tu atuk tanyolah: kau belaja marin tu sapo yang tanggung, biasiswa sapo, kerajaan mano? Ado ko Amarika na yang bori kau duit. Adoko Israel nolong abah kau motong?

Apo jawab eh? ITU DAH TANGGUNG JAWAB KERAJAAN.

Jadi, atuk raso ramai la'ie kek luar nun yang samo pomikiran eh ngan cucu atuk yang botuah ni. Jadi atuk mintak kau orang tolong jawab soalan-soalan atuk ni dengan ikhlas.

1. Apo maksud tanggung jawab tu?

2. Ponah tak omak abah kau orang suruh kau orang buek cam tu.? Bilo dah dibori susu kito baleh nagn tubo.

3. Kok dah camtu, maksud eh buleh kito lawan omak ayah kito yang dah botanggungjawab membosakan kito, menyekolahkan kito hinggolah kito ni jadi orang.

4. Sanggup ko anak-anak kito ni ORANG MELAYU botuankan orang lain yang bukan sokoturunan mo kito?

5. Satu hari cucu kito botanyo, apo plak orang melayu hanyo duduk dalam sarang merpati cam kek singapor tu, oranglain duduk kek rumah yang bosa2?

JADI ATUK NAK MINTAK KEK CUCU-CUCU ATOK, JAWABLAH SOALAN-SOALN DI ATEH TU DENGAN IKHLAS.

P/S: Atuk tongah sobak ni, air mato meleleh leh dah. Atuk toringat 'anak kecil main api' BUMI DIPIJAK MILIK ORANG'.